ތަޢުލީމީ ދޮރުތައް ބަންދުވިޔަ ނުދޭށެވެ. ޢިލްމީ ގޮތުން ރަށަށް ކުރިއެރުންތައް ހޯދުމަށްޓަކައި ރައްޔިތުންގެ ދައުރު ފުޅާކުރަމާ

ޢިލްމު އުނގެނުމަކީ، އިސްލާމްދީން ބާރުއަޅާ ކަމެކެވެ. ކިޔަވާ ކުދިންނަށް ކިޔެވުމުގެ މަގުފަހިކޮށް ދިނުމަކީ، ދިވެހި ރާއްޖޭގެ ޤާނޫނު އަސާސީން ކަނޑައެޅިގެން ބަޔާންވެ އައިސްފައިވާ ކަމެކެވެ.

އިލްމީ ދާއިރާ ދުވަހެއް ދުވަހަކަށް ފުޅާވެ ތަނަވަސް ވަމުން އެބަދެއެވެ. ކިޔެވުމާ، ކިޔަވާ ދިނުމާ، އުނގެނުމާ، އަދި އުނގަންނާ ދިނުމުގެ އައު ގޮތަތައް މިދަނީ ތަޢާރަފުވަމުންނެވެ. އެހެންކަމުން މިފަދަ ދުވަސްވަރެއްގައި ޢިލްމީ ގޮތުން ރަށުފެންވަރުގައި ރަށަށް ކުރިއެރުން ހޯދުމަށްޓަކައި މިހާރަށްވުރެ ބޮޑަށް ރައްޔިތުންގެ ދައުރު ފުޅާކުރަންޖެއެވެ. ސަރުކާރުން ކޮށްދޭނެކަމަށް ބަލައިގެން ސަރުކާރަށް ބަރޯސާވެގެން އަޅުގަނޑުމެން ރައްޔިތުން އެއްވެސް މަސައްކަތެއް ނުކޮށް ތިބޭތިބުން ނިމުމަކަށްގެންނަންވެއްޖެއެވެ. އަޅުގަނޑުމެންގެ ހާލަތު ބަދަލުކުރެވޭނީ ހަމަ އަޅުގަނޑުމެންނަށެވެ.

އެނިގިވަޑައިގަންނަވާނޭފަދައިން ދިވެހިންގެ ތެރޭގައިވެސް ހަމައެކަނި، ހ، ށ ދަސްކޮށްލައިގެން، ވޮށުފިލާ ހިފައިގެން ކިޔަވާގެއަށް ގޮސް އަލިފު، ބާ އަޅާ ދަސްކޮށް، ފަރުޖެހުނު ޒަމާނެއްވެސް ދިޔައެވެ. ތަޢުލީމު ދިޔާނާގެ އެއްވަނަ ބަޔާ، ދެވަނަބާ އަދި ތިންވަނަ ބައި ދަސްކޮށްގެން ރަށުގެ ކަތީބުކަމަށް އެރުނު ދުވަސްވަރެއްވެސް މާޒީއާއި އެކުވެ ހިނގައްޖެއެވެ. ދުރޫސުލް އަޚްލާޤުގެ ތިންފޮތް ދަސްކޮށްގެން ރަށު މިސްކިތުގެ މުދިމްކަން ކުރެވުނު ދުވަސް ހަނދާންވާ އެތައްބަޔަކު ރާއްޖޭގައި އަދިވެސް އެބައުޅެއެވެ. ބުނަންބޭނުންވާ ވާހަކަ ނުބުނެ ލަސްވަމުންދާތީވެ، ފޫހިވާގޮތް ވެދާނެއެވެ.

މަޢާފުކުރާށެވެ. ކުއްލިއަކަށް ބުނެފިނަމަ ޤަބޫލުކުރަން ދަތިވެދާނެއެވެ. އަލްމަރުޙޫމް މުޙައްމަދު އަމީން ވެރިކަމުގެ ދުވަސްވަރުންފެށިގެން، ރާއްޖޭގެ ތަޢުލީމީ ބިންގާ ތެދަށްއެޅި، އެބިންގަލުގެމަތީގައި ބިނާކުރެވެމުންދިޔަ ފާރު، އަލްމަރުޙޫމް ނާސިރުގެ ވެރިކަމުގެ ދައުރުގައި ޖީސީއީ އޯލެވެލް ފެންވަރަށް އާރާސްތުކުރެވުނެވެ. އެއަށްފަހު އަލްއުސްތާދު މަޢުމޫން ޢަބްދުލް ޤައްޔޫމުގެ ވެރިކަމުގައި އެފާރު އިތުރަށް ބިނާކޮށް އަރާސްތުކުރެވި، 30 އަހަރުގެ ދިގުމުއްދަތުގައިވަނީ، ޖީސީއީ އޭލެވެލް ފެންވަރަށް މަތިކޮށް، ރާއްޖެތެރެއަށް ޖީސީއީ އޯލެވެލް ފުޅާކޮށް، ކޮލެޖު ތަޢުލީމް މާލެއާއި އަތޮޅުތެރޭގައި ދެވެންފެށި، ގިނަރަށްރަށުގައި ޖީސީއީ އޭލެވެލް ފެންވަރަށް ކިޔެވޭނޭ ވަރަށް ބިނާކުރެވިފައެވެ. އަދި ނުއުފަންނަ ނަމަވެސް ދިވެހި ރާއްޖޭގައި އަމިއްލަ ޔުނިވާސިޓީއެއް ޤާއިމްކުރެވިގެންދާނޭ ކަމުގެ ފޮނިފޮނި ހުވަފެންވެސްވަނީ ދައްކައިފައެވެ.

ތަޢުލީމާ ތަރުބިއްޔަތު ފުޅާވެ ތަރަށްޤީވަމުން ދިޔަވަރަކަށް، ވަޒީފާގެ ފުރުޞަތުތައް ގިނަވެ އިތުރުވަމުން ދިޔައެވެ. ސެޓްފިކެޓަކާ ނުލާނޫނީ، މިސްކިތު ފާނޫޒަށް ތެޔޮނޭޅޭ ފެންވަރަށް ތަރައްޤީވިއެވެ. އޯލެވެލް ފާސްތަކާ، އޭލެވެލް ފާސްނެތި ސަރުކާރު ގޮނޑިއެއްގައި އިށިނުއިދެވޭ ފެންވަރަށް ދިވެހިންގެ މަސައްކަތުގެ ދާއިރާތަށް ފުޅާވެގެން ދިޔައެވެ. އެއްމެ ކުޑަމިނުން އެޑްވާންސް ސެޓްފިކެޓެއް ނެތީވިއްޔާ މީހަކަށް ނުވާ ދަރަޖައަށް ތަޢުލީމު މިވަނީ ފުޅާވެފައެވެ. ވޮށުފިލައާއި، އެދުރުގެއާ، ޙަތިމު ފަރިއޮޅާ އަދި ތަޢުލީމް ދިޔާނާ ފަދަ ފޮތްތައް މިވަނީ ދިވެހިންގެ ތަރިކަތަކެއްކަމުގައި ވެފައެވެ. ނޫނީ ހަމައެކަނި، އާދަކާދަތަކަކަށް ވެފައެވެ.

ދުވަސްތަކާ، މަސްތައް މާޒީއާ އެކަވަމުން ދިޔައެވެ. އެތަކެއް އަހަރުތަކެއް ދިވެހި ތަޢުލީމީ ހަޔާތުގައި ގުނެމުން ދިއައެވެ. އަހަރެއް އަހަރަކަށް ތަޢުލީމަށް ސަރުކާރުގެ ބަޖެޓުންކުރާ ޚަރަދުގެ މިންވަރު ބޮޑުވަމުން ދިއައެވެ. ތަޢުލީމަށް ކުރާ ހޭދަ، ނާސިރުގެ ޙަޔާތްޕުޅުންފެށިގެން، ބަޖެޓްގެ 10 އިންސައްތައިން 11 އިންސައްތައަށް ބޮޑުވެ، 12 އިންސައްތައިން 15 އިންސައްތައަށް މަތިވެ، 16 އިންސަތައިން 18 އިންސައްތައަށް އިތުރުވެގެންދިޔައެވެ. ތަޢުލީމާ މަތީ ތަޢުލީމީ ފުރުޞަތުތައް ދިވެހި ރައްޔިތުންނަށް ތަނަވަސްވަމުން ދިޔައެވެ. ވަޒީފާގެ ފުރުޞަތުތަކަށް ތަޢުލީމީ ހޭލުންތެރި ޒުވާނުން ވަންނަން ފެށިއެވެ. ތަޢުލީމަށް ހިއްޖެއްސުމަށް، އެކަމަށް މަގުތައް ފަހިކޮށްދެމުން ދިޔައެވެ.

ދިވެހި ދަރިންނަށް ދެވޭ ތަޢުލީމް ބޭނުންތެރިކަމާއެކު އެންމެ ފުރިހަމަކަމާއިއެކު ބޭނުންކުރުމުގެ މަޤުތަނަވަސް ކޮށްދިނުމަށް އެކިއެކި ގޮތްގޮތުން ސަރުކާރުން މަސައްކަތް ފެށިއެވެ. ފޮތްފަންސުރު ފަސޭހައިން ލިބޭނޭ މަގުތައް ތަނަވަސް ކޮށްދެމުން ދިޔައެވެ. ދަރިވަރުންނަށް އުނގަންނާ ދިނުމަށް ބޭނުންވާ މިންވަރަށް ރާއްޖެއިން އެކަށީގެންވާ ޓީޗަރުން ލިބެންނެތުމުން، ރާއްޖެއިން ބޭރުން، ޓީޗަރުން ގެންނަން ފެށުނެވެ. ރާއްޖެއިން ޓީޗަރުންނާ މުދައްރިސުން ތަމްރީނުކުރަން ފެށިއެވެ. ތަމްރީން ވުމުގެ ދޮރުތަށް ބަންދުވިޔަ ނުދިނުމަށް އެތައް ގޮތްގޮތަކުން މަސައްކަތް ކުރަމުން ދިޔައެވެ.

ތަމްރީނީ މަރުކަޒުތަކަށް، ބޭނުންވާ މިންވަރަށް ސަރުކާރުގެ ބަޖެޓުން ޚަރަދު ކުރަމުން ދިޔައެވެ. ބައެއް ކޯސްތައް ހިލޭ ކިޔަވާ ދެމުން ދިޔައެވެ. ދަސްކުރަންޖެހޭ ލިޔެކިޔުންތަކާ، ކިޔަވަންޖެހޭ ފޮތްތައް ހިލޭ ފޯރުކުރަމުން ދިޔައެވެ. އަނެއްބައި ކޯސްތަށް ކިޔަވަމުންދާ ދަރިވަރުންނަށް ޕޮކެޓްމަނީ އާއި، ޓިޔުޝަންފީ ސަރުކާރުން ފޯރުވަމުން ދިޔައެވެ. ކިޔަވާދޭ ތަންތަނަށް ބޭނުންވާ ޗޯކާ، މާކަރާ، އެހެނިހެން ސާމާނު މަދުނުވާނޭ މިންވަރަށް ފޯރުކޮށްދެމުން ދިޔައެވެ. ތަޢުލީމީ މުރައްބީންތަކެއް އުފެއްދުމުގެ ނިޔަތުގައެވެ. ދިވެހި ފަސްގަނޑުން އިލްމީ ދަރިންތަކެއް ނެރުމުގެ ބޭނުމުގައެވެ.

ދުވަހެއް ދުވަހަކަށް ތަޢުލީމީ ދޮރުތައް ފުޅާވެ، އެކިއެކި ފަލްސަފާތައްވެސް ދިވެހި ތަޢުލީމީ ދާއިރާގެ އިސްވެރިންނާ، ހިންގުންތެރިންނަށް ފެންނަމުންދިޔައެވެ. ވަށާޖެހޭ ތަޢުލީމުގެ މުޙިއްމުކަން އެނގި އޭގެ ބޭނުންކުރުވޭނޭ ގޮތްތައް ތަޢާރަފު ކުރަމުން ދިޔައެވެ. ބައެއް ސްކޫލް މަދަރުސާތައް ޕްރައިވެޓައިޒްކުރެވި، ރަނގަޅުތަޢުލީމެއް ދަރިވަރުންނަށް ލިބޭނޭ މަގުތަށް ތަނަވަސް ކުރުމަށް މަސައްކަތް ކުރަމުން ދިޔައެވެ.

ނަމަވެސް، ތަޢުލީމީ ދޮރުތައް ބަންދުވިޔަ ނުދޭށެވެ.

ކިޔަވާ ކުދިންނަށް އެކުދިންނަށް ކިޔަވާދޭ ޓީޗަރުންނަށް ބޭނުންވާނޭ ޗޯކާއި، މާކަރާ ފޮތް ފަންސޫރު ފަސޭހައިން ލިބޭނޭ ގޮތް ސަރުކާރުން ތަނަވަސް ކުރަންޖެހޭނެއެވެ.

ތަޢުލީމީ މަގުތައް އަލިކުރާށެވެ.

ދަރިވަރުން އެކުދިން ކުރިއަށް ދާން ބޭނުންވާ މަގުން ކުރިއަށް ދިޔުމަށް އެމަގު އަލިކޮށްދޭށެވެ. ކޮލެޖު ތަޢުލީމަށް ދަރިވަރުންނަށް ދެމުންދިޔަ އެލަވަންސް ތައް މިހާރުވަނީ ކަނޑާލާފައެވެ. ޖަލުގައި ހައްޔަރުކޮށްފައިވާ އެތައްހާސް ގައިދީންނަކަށް، ކޮންމެ ބޮލަކަށް ދުވާލަކަށް 1100 ރުފިޔާ ޚަރަދުކުރާއިރު، ކިޔަވާކުދިންނަށް މަހަކަށް 1100 ރުފިޔާ ޚަރަދުކުރުން ބޮޑުވަނީތޯއެވެ؟ ހިޔުމަން ރައިޓުސް ކޮމިޝަނާ، ޓޯޗް ޓް ވިކްޓިމްސް އެސޯސިއޭޝަނާ އެހެން އެސޯސިއޭޝަން ތަކުންވެސް ދައްކަނީ ކުށްވެރިންގެ ޙައްޤުތަކުގެ ވާހަކައެވެ. ކިޔަވާކުދިންގެ ޙައްޤުތައް ފަހެ ކޮބައިތޯއެވެ؟

ތަޢުލީމީ އިތުރު ފަހި މަގުތައް ކޮށާދޭށެވެ.

ހޭންޑް އައުޓްތަކަށް ފައިސާ ނުނަގާށެވެ. ހިލޭ ދެމުންދިޔަ ފޮތްތައް ހިލޭ ދޭށެވެ. ލޯނުވެސް ދޭށެވެ. އެކަމަކު އޭގައި އިންޓަރެސްޓެއް ނެތިއެވެ. އެއީ ރިބާކަމަށް ގިނަ ޢިލްމުވެރިން ބުނާތީއެވެ. އަޅުގަނޑު އޭގެ މަޢުލޫމާތު ހޯދުމަށް ގުޅާލި 5 އިލްމުވެރިންގެ ތެރެއިން އިލްޔާސް ޙުސައިންއާ، ފަރީދު އަދި ޑރ.ސައްތާރު ބުނުއްވަނީ އެއީ ކަނޑައެޅިގެން ރިބާކަމަށެވެ. އެއީ އުފެއްދުމަށް ނަގާ ދަރަންޏެއް ނޫންކަމުގައެވެ. ނަމަވެސް ޑރ. މަޖީދު އަދި ޑރ. އަފްރާޝީމް ވިދާޅުވީ ބައެއް ޢިލްމުވެރިން ބުނާގޮތުގައި މަޖުބޫރުވެ، އެއްވެސް ގޮތެއް ނެތިއްޔާ އެނެގުމަކުން މައްސަލައެއް ނެތްކަމުގައެވެ.

ސަރުކާރުން ތަޢުލީމަށް ކުރާ ހޭދަ ކުޑަވިޔަ ނުދޭށެވެ. ތަޢުލީމް އެއްފަރާތް ނުކުރާށެވެ.

ޕުރައިވެޓައިޒް ކުރުމަކުން މައްސަލައެއް ނެތެވެ. ތަޢުލީމް އިތުރަށް ފުރިހަމަވެގެން ހިނގާދާނެއެވެ. ތަޢުލީމީ އެފަދަ މަގުތަކަށް ފުރުޞަތުތައް ހުޅުވާށެވެ. ނަމަވެސް، ރައްޔިތުންގެ ޖީބަށް ބާރުބޮޑުވާ ގޮތްގޮތަށް ކަންތައްތައް ނުކުރާށެވެ. ސަރުކާރުން ތަޢުލީމަށް ކުރާހޭދަ ބޮޑުކުރާށެވެ. ކުޑަވިޔަނުދޭށެވެ. 18 އިންސައްތައިން 17 އިންސައްތައަށް ވެއްޓި މިއަހަރު 13 އިންސައްތައަށް ކުޑަވީއެވެ. ތަޢުލީމީ ފުރުޞަތުތައް ކުޑަވަނީއެވެ. ރައްޔިތުންނަށް ބާރުބޮޑުވަނީއެވެ. އިލްމީ ދޮރުތައް ބަންދުވަނީއެވެ. މިކަމާމެދު ފުންކޮށް ވިސްނާށެވެ. ދިވެހި ޤައުމުގެ ކުރިމަގަށްޓަކައެވެ. ދަރިންގެ ދަރިންނަށްޓަކައެވެ. އެހެންކަމުން އަޅުގަނޑު ކުރިންވެސް ދެންނެވިފަދައިން މިއަދު އަޅުގަނޑުމެން ހޭލާން ވެއްޖެއެވެ. އަޅުގަނޑުމެންގެ މުސްތަގުބަލައްޓަކައި އަދި ހާއްސަގޮތެއްގައި އަޅުގަނޑުމެންގެ ދަރިދަރިންގެ މުސްތަގުބަލައްޓަކައި ގަދައަޅާ މަސައްކަތްކުރަން ނިކުތުމަށް ރަށުގެ ރައްޔިތުންނަށް އަޅުގަނޑު އިލްތިމާސްކުރަމެވެ. އެއީ ތަނެއްގައި ތައުލީމީ ބަޔަކު ނެތްތަނެއް ތަރައްގީވެ ކުރިއަރާ ނުދާނެތީއެވެ.